En januaro okazis la jam tradicia semajnofino de la israelaj esperanistoj, ĉi-foje en Mecada. Legu pri ĝi en aparta raporto.

En majo okazis en Tel-Avivo la duonjara Landa Kunveno de ELI, kun rekorda nombro da partoprenantoj kaj tre interesa programo. Post multaj jaroj ĉeestis sufiĉe multaj junuloj en ĉi tiu evento.

Granda sukceso: Eran Vodevoz iniciatis kaj efektivigis nian penetradon al la popularaj Forumoj de TAPUZ, la israela hebrelingva paĝaro en la Interreto. Ni akiris tie retejon kun Forumo, kaj tiel okazas ke Esperanto plifamiĝas inter la vizitantoj de la forumoj de Tapuz. Neesperantistoj kaj Esperantistoj povas skribi tie, prezentante demandojn kaj opiniojn pri Esperanto, lernantoj faras lingvajn demandojn kaj ankaŭ okazas debatoj pri nia afero. Preskaŭ ĉiuj vizitantoj estas junuloj. Krome aperas tie multe da materialo pri Esperanto, en la hebrea lingvo.

Post la landa kunveno okazis "foruma renkontiĝo", kun ĉeesto de novaj junuloj el la forumo. Vidu foton venontpaĝe.

En Pentekosto (Ŝavuot), junio, okazis pikniko de esperantistoj en Parko Ha-Jarkon, Tel-Avivo. Malgraŭ la malgranda nombro de partoprenantoj (18) – la etoso estis tre bona kaj la homoj tre ĝuis la eventon.

Niaj gesamideanoj kunvenas regule en tri urboj:

- En la ĉefa klubo en Tel-Avivo kunvenas ĉiusemajne 12-25 personoj kaj aŭdas tre variajn prelegojn, partoprenas programojn de anekdotoj aŭ ludoj, kantas, ktp.

- En Hajfa la grupo, kiu estas pli malgranda, renkontiĝas ĉiun duan semajnon por interamika babilado.

- En Jerusalemo okazas kunveno de la loka grupo ĉiun monaton en nova kunvenejo, la Rusa Biblioteko. En la programo: prelegoj pri variaj temoj.

En Tel-Avivo okazis kurso de Esperanto gvidata de Doron Modan. Finis ĝin 8 personoj, el kiuj la granda parto venadas nun al la klubo kaj partoprenis la paroligan rondon, kiun li gvidis kune kun Josef Ŝemer.

En la Teĥnijon okazis kurso gvidata de Anat Zajdman. Finis ĝin 7 studentoj.

Dum la lasta jaro okazis kelkaj kunvenoj de nia junulara grupo, JELI, sed dum la plej lastaj monatoj la agado malvigliĝis, eble pro la soldatiĝo de la ĉefaktivulo Sergej. Dum decembro 2002 okazis semajnofino de JELI en Makabim, kun ĉeesto de 8 personoj.

Almenaŭ kelkaj dekoj da israelaj gejunuloj komencis memlerni Esperanton ĉi-jare per kursoj aperantaj en la Interreto aŭ per la hebrelingva kurso aperanta sur la kompaktdisko (KD) eldonita de Gian Piero Savio. Ni ankoraŭ ne scias kiom el ili vere finis/finos la kursojn (certe eta parto), sed ni jam konstatis, ke la nuna junularo preferas lerni Esperanton per la komputilo ol en klasĉambro.

Nia juna aktivulo Sergej Tyrin multege laboris dum 2003 por reordigi la retejon de ELI en la Interreto, pligrandigante ĝian enhavon. Nun ĉiu vizitanto povas trovi tie la programon de la Tel-Aviva klubo, kontaktadresojn al ĉiuj kluboj, hebrelingvan materialon pri Esperanto kaj pliajn aferojn.

En la reta adresaro de ELI troviĝas jam pli ol 60 membroj. Tio ebligas al ni sendi al ili per la Reto leterojn (invitleteroj al landaj kunvenoj, programo de la Tel-Aviva klubo ktp) kaj alian materialon. Dezirantoj aliĝi al la retadresaro povas anonci sin ĉe la redakcio.