En la israela gazetaro aperis kelkaj mencioj pri Esperanto. Jen la plej gravaj:

– La 26.2 la ĵurnalo Haarec publikigis tutan artikolon pri Josef Murĵan, kadre de rubriko kiu pritraktas eminentajn israelajn forpasintojn. Ĝia titolo tekstas: "Instruis Esperanton kaŝe, pro timo de Stalinaj agentoj".
La iniciato skribi al la redaktoro de la rubriko estis de Doron Modan kaj de la filino de J. Murĵan.

– La 21.4 aperis en la ĵurnalo Jediot Aĥaronot artikolo pri la lingva problemo ĉe Eŭropa Unio, en kiu oni parolis pri Esperanto kiel unu de la solvoj.

En la israela radio okazis tri priesperantaj programeroj:

– La 14-an de aprilo: en Galej-Cahal oni dediĉis pli ol 2 minutoj al LLZ kaj Esperanto okaze de la datreveno de lia morto.

– La saman tagon ankaŭ Kol Israel menciis la datrevenon per kelkaj vortoj.

– Plej grave: la 24-an de aprilo, 9-minuta programero pri d-ro Zamenhof kaj E-o, inkluzive de disaŭdigo de la voĉo de LLZ kaj de korusa La Espero. Ĝi okazis kadre de la programo "Demando de Gusto" (Ŝeela Ŝel Ta'am) de Ĥajim Kejnan, sekve de letero sendita al li de Doron Modan, petanta aŭdigi la voĉon de Zamenhof.

En marto okazis Memorvespero pri nia forpasinta aktivulo Josef Murĵan. Ĉeestis 50 personoj: 30 esperantistoj kaj 20 (!) familianoj.

La Vespero estis dulingva. La programo estis tre abunda kaj inkludis interalie paroladojn de kelkaj lernantinoj de J. Murĵan kaj de liaj edzino, fratino kaj gefiloj. Ĉiuj ĉeestantoj estis tre kortuŝitaj de la tre digna programo. Oni ankaŭ projekciis vidbendan filmon faritan en j. 2000 dum la festeno okazinta post la apero de la Plena Vortaro de J. Murĵan. ELI disdonis al la partoprenantoj broŝuritajn memorfoliojn pri la forpasinto.

Dum la lasta decembro ni turnis nin al niaj membroj petante de ili donaci monon por nia klubo en Tel-Avivo, post kiam la posedantoj de la Domo Bikurej-Haitim komencis postuli de ni altan lupagon.

La rezulto estis nekredeble kontentiga: 39 personoj kontribuis monon. El ili, 26 personoj donacis almenaŭ 100 ILS. Jen la listo de tiuj lastaj:
Jael Ŝelaĥ, Mike Slobodkin, Raĥel Liberman, Moŝe Ben-Porat, Suzi Rosenberg, Matilda Landaŭ, Gian-Piero Savio, Aleks Kerbel, Josi Ŝemer, Jeĥezkel Malkin, Lea Kudevicki, Nava-Elvir Yeni, Amos Ŝapir, Mirjam Felman, Ŝulamit Basok, Miĥael Lev, Nisim Kalev, Anat Zajdman, Irene Strulovic, Ĥajim Midler, Kiti Ziĥerman, Jehoŝua Tilleman, Ana Kuperŝtok, Beki Turgeman, Ŝlomo Lerman, Jicĥak Jiŝaj.

Sed la plej malavara donaco venis el eksterlando: sinjorino Ans Bakker-ten Hagen el Nederlando sendis al ni grandan sumon.

Tiuj kiuj ankoraŭ ne kontribuis kaj volas fari tion, povas sendi la monon al la adreso de ELI (aperas sur la interna flanko de la kovrilo).

Dum la lastaj monatoj okazas E-kurso nivelo B. Temas pri paroliga kurso, surbaze de la romaneto Gerda Malaperis de Claude Piron. La kurson iniciatis kaj kunordigas Doron Modan, kaj gvidas ĝin krom li, laŭvice: Josef Ŝemer, Eldad Salzman, Sergej Tyrin kaj Allon Rothfarb.